Húsnæðismarkaðurinn - Mánaðarskýrsla september 2018

Mánaðarskýrsla Íbúðalánasjóðs í september er nú komin út. Á meðal þess sem fjallað er um í skýrslunni að þessu sinni er eftirfarandi:

• Framboð af nýbyggingum á íbúðamarkaði hefur aukist talsvert það sem af er þessu ári. Á fyrstu sjö mánuðum ársins voru íbúðir í nýbyggingum, það er íbúðir með byggingarár skráð í ár eða í fyrra, samtals 18% allra íbúða sem auglýstar voru til sölu á höfuðborgarsvæðinu.
• Um 70% nýbyggðra íbúða á höfuðborgarsvæðinu seljast á eða yfir ásettu verði.
• Vísitala ásetts verðs íbúða á höfuðborgarsvæðinu lækkaði um 0,6% í júlí en hefur hækkað um samtals 4,2% á undanförnu ári. Hækkun ásetts verðs íbúða hefur verið minni en hækkun söluverðs íbúða á höfuðborgarsvæðinu undanfarið ár.
• Frá árinu 2010 hefur húsnæðiskostnaður fasteignaeigenda á Íslandi hækkað um 43% umfram almennt verðlag. Það er mun meira en á hinum Norðurlöndunum en næstmestu hækkanirnar eru í Noregi og Svíþjóð þar sem húsnæðiskostnaður hefur hækkað um 20-23% umfram almennt verðlag á sama tímabili.
• Ávöxtun leiguhúsnæðis er innan við 7% á flestum svæðum innan höfuðborgarsvæðisins. Á sumum svæðum utan höfuðborgarsvæðisins er ávöxtunin ívið hærri.
• Hlutdeild fyrirtækja á leigumarkaði hefur aukist undanfarin ár. Hlutdeild einstaklinga meðal leigusala hefur minnkað að sama skapi en þeir eru þó enn stærsti hópur leigusala með 57% hlutdeild á markaðnum.
• Konur eru marktækt líklegri en karlar til að vera á leigumarkaði. Um 18% kvenna leigja húsnæði sitt samanborið við 12% karla samkvæmt nýjustu könnun Íbúðalánasjóðs.
• Lægstu vextir verðtryggðra íbúðalána hækkuðu í ágúst, úr rúmum 2,4% í um 2,5%. Það er í fyrsta skipti sem lægstu vextir á verðtryggðum íbúðalánum hækka síðan í mars í fyrra.
• Hrein ný íbúðalán lífeyrissjóða drógust saman um 2,7% að nafnvirði á fyrri helmingi þessa árs. Á sama tíma jukust hrein ný íbúðalán bankanna um 11,5% og því jókst hlutdeild bankanna á íbúðalánamarkaðnum samanborið við lífeyrissjóði.
• Að raunvirði hafa íbúðaskuldir heimilanna nú hækkað um 5,3% á 12 mánuðum. Það er mesta 12 mánaða hækkun í heildaríbúðaskuldum heimila að raunvirði undanfarinn áratug.

Skýrsluna má lesa í heild sinni hér: Húsnæðismarkaðurinn - september 2018