-
Æskilegt að vísitala húsnæðisverðs og vísitala launa haldist í hendur
-
Verð á fjölbýli lækkaði í fyrsta sinn í tvö ár í júní á sama tíma og laun hækkuðu svo stærðirnar eru byrjaðar að nálgast að nýju
Húsnæðisverð hefur hækkað þrefalt hraðar en laun undanfarna tólf mánuði. Að mati hagdeildar Íbúðalánasjóðs getur sú þróun ekki haldið áfram lengi. Verð á fjölbýli á höfuðborgarsvæðinu hækkaði um alls 21,4% frá júní 2016 en á sama tíma hækkuðu laun aðeins um 7,3%. Æskilegt er að þessar tvær stærðir haldist í hendur. Það var tilfellið síðasta sumar, þegar bæði verð á fjölbýli og laun í landinu höfðu hækkað um rúm 12% milli ára.
Síðasta árið hefur fasteignaverð aftur á móti tekið hratt fram úr þróun launa. Staðan er því umtalsvert verri í dag en fyrir ári síðan, sér í lagi fyrir þá sem eru að reyna komast inn á fasteignamarkaðinn.
Eins og greint var frá í síðustu viku hefur þó örlítil breyting orðið á þessari þróun núna allra síðustu mánuði en í júní lækkaði verð á fjölbýli um 0,2% frá fyrri mánuði sem var fyrsta lækkunin sem mælist í tvö ár. Á þessum sama tíma jókst vísitala launa um 1% milli mánaða og gæti því þróunin verið í þá átt að þessar stærðir færist nú aftur nær hvor annarri með hægari vexti fasteignaverðs.
