Aðgerðahópur stjórnvalda í húsnæðismálum kynnti aðgerðaáætlun sína í dag í húsakynnum Íbúðalánasjóðs.
Á fundinum var skrifað undir nýjan húsnæðissáttmála ríkisstjórnarinnar og sveitarfélaganna sem er afrakstur mikillar vinnu hópsins síðustu vikur. Húsnæðissáttmálinn felur í sér 14 sérstakar og almennar aðgerðir til að bregðast við því neyðarástandi sem ríkir á húsnæðismarkaði. Ráðherra félags-, jafnréttis- og húsnæðismála, Þorsteinn Víglundsson, ráðherra umhverfis- og auðlindamála, Björt Ólafsdóttir og Dagur B. Eggertsson, borgarstjóri munu kynna sáttmálann og sitja að því loknu fyrir svörum um þær aðgerðir sem í honum felast.
Í húsnæðissáttmálanum felast einhverjar umfangsmestu aðgerðir sem farið hefur verið í í húsnæðismálum hér á landi.
Aðgerðirnar eru eftirfarandi:
- Vandinn kortlagður. Að fyrir liggi greining á þörf á íbúðarhúsnæði til 2022
- Húsnæðisáætlanir samræmdar. Að fyrir liggi á hverjum tíma áætlun um uppbyggingu húsnæðis sem mætir fólksfjölgun. Grunnur að húsnæðisstefnu stjórnvalda.
- Hvatar til langtímaleigu og almennrar notkunar íbúðarhúsnæðis. Sveitarfélög stuðli að því að íbúðir fari í langtímaleigu eða í almenna notkun, m.a. með innheimtu tómthúsagjalds. Skattalegir hvatar verði aðlagaðir að þessu markmiði.
- Aukinn sveigjanleiki í útleigu á hluta húsnæðis. Fólk í stórum húsum geti án verulegrar skriffinnsku eða kostnaðar breytt notkun húsa sinna og leigt frá sér íbúðir. Skoða áhrif skerðinga og skattalega hvata sérstaklega og kostnaðarmeta.
- Einföldun á regluverki byggingarmála. Unnar verði tillögur um breytingar á lögum um mannvirki og tilteknar breytingar á byggingarreglugerð sem miða að lækkun byggingarkostnaðar og einfaldari og skilvirkari stjórnsýslu. Gæta þarf þess að reglugerðin stuðli að markmiðum Íslands í loftlagsmálum.
- Einföldun á regluverki og framkvæmd skipulagsmála. Lækkun byggingarkostnaðar.
- Fræðsla til leigusala og leigjenda. Aukið gagnsæi í markaðsupplýsingum á leigumarkaði og aukin þekking á réttindum og skyldum leigusala og leigjenda leiði til þess að fleiri íbúðir skili sér í langtímaleigu
- Gjaldtaka innviða/samfélagsgjalds verði skoðuð og metin.
- Ríkislóðum komið í byggð. Lóðir ríkisins á höfuðborgarsvæðinu verði skipulagðar fyrir íbúðabyggð í samstarfi við sveitarfélögin á höfuðborgarsvæðinu. Alls verði um 2.000 íbúðir að ræða á þessum reitum, með áherslu á litlar og hagkvæmar íbúðir.
- Fyrstu skref á húsnæðismarkaði. Fjölbreyttari úrræði fyrir fólk sem er að stíga fyrstu skrefin á fasteignamarkaði. Skoðað verði sérstaklega úrræði fyrir lægri tekjuhópa sem ekki ráða við eiginfjárhlutfall fasteignakaupa.
- Hækkun frítekjumarks húsnæðisbóta og hækkun bótanna. Frítekjumark húsnæðisbóta hækkað, bætur hækka.
- Sérstakar aðgerðir vegna fatlaðs fólks. Flýta fyrir og fjölga sértækum húsnæðisúrræðum fyrir fatlað fólk með því að leita allra leiða til að ná niður kostnaði við byggingu slíkra úrræða og leysa fjármögnun. Auka möguleika fatlaðs fólks á því að lifa sjálfstæðu lífi, skv. framkvæmdaáætlun um málefni fatlaðs fólks.
- Fjármögnun á auknum fjölda námsmannaíbúða. Flýta fyrir uppbyggingu á námsmannaíbúðum HR, BN og FS. Tryggð fjármögnun allt að 900 íbúða, lánsfjármagn frá ÍLS.
- Aukið fjármagn verður lagt í stofnframlög til uppbyggingar Leiguheimila. Áframhaldandi uppbygging Almenna íbúðakerfisins með 1,5 milljarða aukningu stofnframlaga árlega á árunum 2016-2022. Auk þess að allt að 900 íbúðir bætast við ef námsmannafélögin leita eftir fjármögnun skv. aðgerð 13.
