- Húsnæðismál eru „stóra málið“ í flestum sveitarfélögum
- Húsnæðisáætlanir draga fram mynd af stöðu húsnæðismála í hverju sveitarfélagi fyrir sig
- Lítil sveitarfélög eiga erfiðast með að finna lausnir í húsnæðismálum
- Fjöldi sveitarstjórnarmanna fékk kynningu á áætlanagerð í húsnæðismálum á fundi hjá Íbúðalánasjóði
- „Húsnæðisáætlanir verða mikilvægt stjórntæki stjórnvalda til þess að fylgjast betur með húsnæðisþörf og þróa húsnæðismarkaðinn í áttina að minni sveiflum og bólumyndun,“ segir forstjóri Íbúðalánasjóðs
Lítið framboð nýbygginga í mörgum sveitarfélögum landsins hefur verið mikið í umræðunni að undanförnu. Á fundi sem Íbúðalánasjóður stóð fyrir í gær með fulltrúum sveitarfélaga kom fram að húsnæðismál eru „stóra málið“ í nær öllum sveitarfélögum landsins. Kjörnir fulltrúar hafa hlotið gagnrýni frá íbúum fyrir að stuðla ekki að hraðari uppbyggingu húsnæðis en það virðast vera ýmsir flöskuhálsar á leiðinni. Á kynningarfundi sem Íbúðalánasjóður hélt í gær var farið yfir húsnæðisáætlanir sveitarfélaga og tillögur sjóðsins að því hvernig þær skuli gerðar.
Á fundinum fór Sigrún Ásta Magnúsdóttir, sérfræðingur hjá hagdeild Íbúðalánasjóðs, yfir aðkomu Íbúðalánasjóðs að gerð húsnæðisáætlana. Tilgangurinn með húsnæðisáætlunum sveitarfélaga er að draga fram mynd af því hver staða húsnæðismála er í hverju sveitarfélagi fyrir sig, greina framboð og eftirspurn eftir margvíslegum húsnæðisformum og setja fram áætlun um hvernig sveitarfélagið ætlar að mæta húsnæðisþörf heimila, bæði til lengri og skemmri tíma. Mikilvægt sé að læra af mistökum sem gerð voru í síðustu uppsveiflu. Á fundinum kom fram að lítil sveitarfélög eiga sérstaklega erfitt með að finna lausnir í húsnæðismálum.
Um er að ræða samstarfsverkefni Íbúðalánasjóðs og Sambands íslenskra sveitarfélaga en í lögum um húsnæðismál er Íbúðalánasjóði falið að stuðla að skipulagi húsnæðismála sem auki möguleika fólks á að eignast eða leigja húsnæði á viðráðanlegum kjörum. Sveitarfélögum er sömuleiðis uppálagt að greina stöðu húsnæðismála innan sinna marka og setja fram séráætlun um hvernig þeim málum skuli háttað. Betri áætlanir geti skapað stöðugleika í húsnæðismálum.
Nokkur sveitarfélög hafa þegar hafið vinnu við húsnæðisáætlanir og kynnti Sigrún Árnadóttir, bæjarstjóri í Sandgerði, fyrir sveitarstjórnarmönnum sem sóttu fundinn hvernig Sandgerði hefur staðið að upphafsskrefunum í sinni vinnu.
Hermann Jónasson, forstjóri Íbúðalánasjóðs: „Fundurinn í dag markar upphaf þessa brýna verkefnis sem Íbúðalánasjóði er ætlað að hafa með höndum. Við munum á næstunni aðstoða sveitarfélög um allt land við gerð húsnæðisáætlana og finnum við fyrir miklum áhuga á frekari kynningum enda segja flestir fulltrúar sveitarfélaganna að húsnæðismál séu „stóra málið“ í þeirra heimabyggð. Við höfum þegar fundað með mörgum sveitarfélögum og munum á næstunni heimsækja sveitarfélögin og hjálpa þeim að bregðast við þörfum íbúanna. Ég tel að húsnæðisáætlanir sveitarfélaga muni verða mikilvægt stjórntæki stjórnvalda á næstunni til þess að fylgjast betur með húsnæðisþörf og þróa húsnæðismarkaðinn í áttina að minni sveiflum og bólumyndun. Með því að styðja við áætlunargerð sveitarfélaga, með ýmis konar sérfræðiaðstoð, viljum við koma í veg fyrir að upp komi staða eins og sú sem landsmenn glíma við í dag, þ.e.a.s. mikill húsnæðisskortur og hækkun verðs umfram byggingarkostnað.“
---
Nánari upplýsingar veita Sigrún Ásta Magnúsdóttir eða Hermann Jónasson hjá Íbúðalánasjóði í s: 569-6900 eða Sigrún Árnadóttir, bæjarstjóri Sandgerðis, í s: 420-7500.
