120 ánægðir gestir á námskeiði ÍLS

Íbúðalánasjóður bauð markaðsaðilum og öðrum áhugasömum aðilum að koma á sérhæft fjármálanámskeið sem fjallar um sértæka eiginleika uppgreiðanlegra skuldabréfa og umgjörð þeirra. Til verksins var fenginn Brian P. Lancaster, prófessor, sem hefur kennt þetta efni við nokkra af bestu viðskiptaháskólum heims auk þess að hafa varið stórum hluta starfsævi sinnar á þessu sviði fjármögnunar fasteignamarkaða beggja megin Atlantshafsins. 

Flest kerfi sem fjármagna húsnæðislán byggja á því að gefa út sérhæfða tegund fjármögnunarbréfa, mjög gjarnan með uppgreiðslueiginleikum þannig að jafnvægi haldist milli útlána og fjármögnunar. Slíkt er til þess fallið að stuðla að stöðugleika á fjármálamarkaði. Þessi tegund af fjármögnunarbréfum húsnæðislána er vel þekkt í Evrópu og Bandaríkjunum, en takmörkuð reynsla er af slíkum bréfum hérlendis enn sem komið er. Slíkum fjármögnunarbréfum fylgir að fjárfestar þurfa að leggja mat á uppgreiðslur húsnæðislánasafna til að verðleggja bréfin auk þess að leggja mat á ýmsa aðra eiginleika bréfanna.
Undanfarið hafa verið miklar umræður um það sem hefur verið kallað danska kerfið í húsnæðismálum og var þessi heimsókn liður í því að fylla betur út í þá þekkingu sem er á kerfinu hérlendis.

Prófessorinn kynnti ekki aðeins fjármögnunarhlið kerfisins heldur varði hann einnig nokkrum tíma í að kynna sjálft húsnæðislánakerfi Bandaríkjanna sem byggist á fjármögnunarskuldabréfum sem greiða má upp. Meðal annars kom fram í máli prófessorsins að stærstur hluti húsnæðislána þar í landi er með beinum eða óbeinum hætti fjármagnað af yfirvöldum þar í landi. 
Fyrir þá 120 sem sóttu námskeiðið var þetta einstakt tækifæri til að fá betri innsýn í þennan hluta húsnæðislánamarkaðarins og læra af reynslu annarra þjóða. Voru gestir á námskeiðinu hæstánægðir með fyrirlestrana og höfðu margir á orði að prófessorinn væri greinilega vel inni í þessum málum og væri hafsjór af fróðleik um málefnið.