Íbúðalánasjóður kynnir breytingar á lánaframboði og nýja vefsíðu

Breytt lánaframboð

Við innleiðingu á nýjum lögum um neytendalán taka gildi nýir lánaskilmálar.  Lánveitingarnar verða fjármagnaðar út lánstímann.  Lánin verða til 40 ára með með föstum vöxtum allan tímann, án vaxtaendurskoðunar.

Aukin upplýsingagjöf og nýjungar í greiðslu- og lánshæfismati og lánaferlum

Íbúðalánasjóður hefur öfluga rafræna greiðslumats- og umsóknarferla á vefsíðu sinni. 

Frá og með 1. nóvember verður ennfremur kynnt til sögunnar nýtt upphaf í lántökuferlinu sem kallað er „Byrjaðu hér“ á vefsíðunni.  Þar er hægt að framkvæma útreikning á greiðslugetu, áður en kauptilboð er gert í fasteign, á sama hátt  og síðar er gert í greiðslumati án auðkenningar og án vistunar á persónuupplýsingum. 

Næsta skref sem boðið er upp á í umsóknarferlinu er að nýta reiknivélina „Samanburður lána/yfirtaka lána“ til að bera saman lán og lánakosti áður en ákvörðun um val á þeim er tekin. 

Þriðja skrefið er að gera greiðslu- og lánshæfismat sem byggir á kauptilboði í ákveðna eign.  Þegar greiðslu- og lánshæfismat hefur verið staðfest fær lántakandi send í tölvupósti ítarleg gögn til að byggja ákvörðun um lántöku á.  Þessi gögn eru:

• Niðurstöður greiðslu- og lánshæfismats. 
• Staðlað eyðublað: Eyðublaðið inniheldur ítarlegar upplýsingar um efni lánssamningsins. Því er ætlað að gefa neytanda ítarlegar upplýsingar til að bera saman ólík lánatilboð. Þetta form er samræmt hjá öllum lánveitendum og í því koma fram greinargóðar upplýsingar um það lán sem í boði er. Sýnishorn af eyðublaðinu miðað við mismunandi lánsfjárhæðir er einnig aðgengilegt á vef sjóðsins.
• Samræmdar upplýsingar um lántöku: Neytendastofa gefur út samræmdar upplýsingar um lántöku þar sem finna má almennar upplýsingar og dæmi um breytingar á höfuðstól og greiðslubyrði verðtryggðra lána og dæmi um breytingar á greiðslubyrði óverðtryggðra lána sem allir lánveitendur byggja samræmda upplýsingagjöf sína á. Neytendastofa birtir einnig almennar upplýsingar um þróun verðlags og ráðstöfunartekna síðustu 10 ár.
• Niðurgreiðslutafla I: Taflan sýnir ítarlega sundurliðaða greiðsluáætlun lánsins miðað við meðaltalsársverðbólgu síðastliðin 10 ár fyrir gerð samnings.
• Greiðsluáætlun: Sýnir ítarlega sundurliðaða greiðsluáætlun lánsins miðað við meðalverðbólgu síðustu 12 mánaða.

Þegar umsækjandi hefur kynnt  sér niðurstöðu greiðslu- og lánshæfimats og þau gögn sem send voru með niðurstöðum greiðslumats sækir hann um lán. 

Á vefsíðu sjóðsins er kynnt sú nýlunda að sýnileg verða gröf sem gefa til kynna þróun á breytum á markaðinum sem hafa áhrif á greiðslugetu lántakanda. Óhagstæð þróun þeirra getur orsakað greiðslu- og skuldavanda.  Ef lántakandi vandar til gerðar greiðslumats og og gerir sér grein fyrir mögulegri þróun á markaði er hann betur í stakk búinn til að takast á við mögulegar niðursveiflur.

Gröfin sýna:

• Vísitölur þær sem lánin fylgja, auk launavísitölu. Einnig má skoða þróun þeirra frá mismunandi tímapunktum. 
• Þróun íbúðaverðs og vísitölu neysluverðs. 
• Þróun íbúðaverðs eftir landshlutum.