Heildarútlán Íbúðalánasjóðs í apríl 2013 námu 703 milljónum króna en þar af voru um 699 milljónir króna vegna almennra lána. Til samanburðar námu almenn útlán í apríl 2012 um 700 milljónum króna. Meðalfjárhæð almennra lána var 9,2 milljónir króna.
Ávöxtunarkrafa allra flokka íbúðabréfa hækkaði í apríl. Nam hækkunin 9-139 punktum. Það sem af er ári hefur ávöxtunarkrafa flokks HFF14 hækkað um 1,72%, HFF24 um 0,52%, HFF34 um 0,32% og HFF44 um 0,08%.
Heildarvelta íbúðabréfa nam um 28,3 milljörðum króna í apríl samanborið við 47,9 milljarða í mars 2013. Greiðslur Íbúðalánasjóðs vegna íbúðabréfa og annarra skuldbindinga námu rúmum 9 milljörðum króna í apríl. Uppgreiðslur námu 1,3 milljörðum króna.
Þróun vanskila útlána
Í lok apríl 2013 hafði hlutfall lána í vanskilum einstaklinga enn lækkað frá því að vanskil í lánasafni Íbúðalánasjóðs náðu hámarki í júlí síðastliðnum.
Í lok apríl nam fjárhæð vanskila útlána til einstaklinga 4,6 milljörðum króna og var undirliggjandi lánavirði 86,7 milljarðar króna eða um 13,04% útlána sjóðsins til einstaklinga. Þetta samsvarar 0,14% lækkun frá fyrra mánuði og var undirliggjandi hlutfall lánafjárhæðar í vanskilum í lok apríl 0,18% lægra en sama hlutfall í apríl 2012. Heimili í vanskilum eru tæplega 4.600 og þar af eru 644 heimili með frystingu á lánum sínum. Alls voru því 9,1% þeirra heimila sem eru með fasteignalán sín hjá Íbúðalánasjóði með lánin í vanskilum í lok apríl 2013.
Í lok apríl nam fjárhæð vanskila útlána til lögaðila alls um 2,9 milljörðum króna og nam undirliggjandi lánavirði 33,5 milljörðum króna. Tengjast því vanskil um 22,4% lánafjárhæðar sjóðsins til lögaðila, sem samsvarar 0,4% lækkun frá fyrri mánuði en er 0,9% hærra hlutfall en í lok apríl 2012.
Vanskil eða frystingar ná samtals til 14,76% lánasafnsins, en sambærilegt hlutfall í apríl 2012 nam 14,74%.
Eignasafnið
Í lok apríl sl. átti Íbúðalánasjóður 2.416 fullnustueignir um land allt og hefur þeim fjölgað um 39 frá því í lok mars. Rétt tæplega helmingur fasteigna sjóðsins var áður í eigu byggingaraðila, fyrirtækja í leiguíbúðarekstri eða annarra lögaðila.
Í útleigu voru 1.047 íbúðir um land allt. Þá voru 285 íbúðir óíbúðarhæfar og eru þær flestar á byggingarstigi og því ekki fullbúnar en nokkur hluti þeirra er óíbúðarhæfur vegna aldurs og ástands.
Í sölumeðferð eru 860 íbúðir, annað hvort komnar í sölu eða unnið er að söluskráningu þeirra.
Í töflu hér til hliðar er yfirlit um staðsetningu eigna flokkað eftir landshlutum og nýtingu/ráðstöfun þeirra.
Frá síðustu áramótun og til aprílloka hefur Íbúðalánasjóður selt 88 eignir, en þá voru 72 eignir með samþykkt kauptilboð. Á sama tíma í fyrra seldi sjóðurinn 38 eignir og hefur hann selt 663 eignir frá ársbyrjun 2008.
Sem fyrr segir eru 1.047 íbúðir í útleigu. Langflestar þeirra eru leigðar til fjölskyldna og einstaklinga sem dvöldu í eignunum þegar Íbúðalánasjóður eignaðist þær. Sjóðurinn hefur einnig heimild til að leigja út eignir í almennri útleigu á þeim svæðum þar sem skortur er á leiguhúsnæði.
Þær íbúðir sem leigðar eru út í almennri útleigu eru auglýstar til leigu á mbl.is og fasteignir.is undir „íbúðir til leigu“ og er eingöngu hægt að sækja þar um að taka þær á leigu. Hægt er að skoða úthlutunarreglur á heimasíðu Íbúðalánasjóðs, ils.is.
Eignir sjóðsins eru leigðar út á markaðsverði og er miðað við sambærilegar eignir eftir staðsetningu, stærð, aldri o.fl..
Allar fasteignasölur á landinu geta tekið eignir Íbúðalánasjóðs í sölumeðferð en í gildi er samstarfssamningur við Félag fasteignasala um verklag við sölu eigna sjóðsins.
Af þeim 2.416 eignum sem Íbúðalánasjóður átti í lok apríl hefur 1.984 eignum verið ráðstafað í útleigu, sölumeðferð eða annað. Þá biðu 432 eignir frekari greiningar. Margar þeirra eru á svæðum þar sem nokkurt offramboð er af eignum til sölu og/eða leigu.
