Stofnað hefur verið leigufélag um hluta af fasteignum sjóðsins og ber félagið heitið Klettur ehf. og verður fyrst um sinn í eigu Íbúðalánasjóðs. Leigufélagið yfirtekur eignarhald og rekstur 524 fasteigna Íbúðalánasjóðs um land allt frá og með 1. janúar 2013. Meirihluti eignanna er nú þegar í útleigu. Rekstur þess er sjálfstæður og hefur félaginu verið kosin stjórn. Félagið yfirtekur núgildandi leigusamninga í óbreyttri mynd. Stofnun leigufélagsins hefur tvö meginmarkmið. Annars vegar að losa um eignarhald Íbúðalánasjóðs á fasteignum og aðskilja rekstur þeirra frá rekstri sjóðsins. Hins vegar að koma til móts við þann vilja stjórnvalda að auka framboð á húsnæði til langtímaleigu.
Ávöxtunarkrafa flokka íbúðabréfa HFF24, HFF34 og HFF44 lækkaði í janúar. Nam lækkunin 19-22 punktum en ávöxtunarkrafa HFF14 hækkaði um 20 punkta.
Heildarvelta íbúðabréfa nam um 37,2 milljörðum króna í janúar samanborið við 23,3 milljarða í desember 2012.
Greiðslur Íbúðalánasjóðs vegna íbúðabréfa og annarra skuldbindinga námu rúmum 2,3 milljörðum króna í janúar. Uppgreiðslur námu um 1,5 milljörðum króna.
Þróun vanskila útlána
Í lok janúar 2013 hafði hlutfall lána í vanskilum einstaklinga lækkað sjötta mánuðinn í röð frá því að vanskil í lánasafni Íbúðalánasjóðs náðu hámarki í júlí síðastliðnum. Þetta er ánægjuleg þróun og vonandi vísbending um það sem koma skal.
Í lok janúar 2013 nam fjárhæð lána einstaklinga í vanskilum tæpum 4,9 milljörðum króna og er undirliggjandi lánavirði 88,5 milljarðar króna eða um 13,4% útlána sjóðsins til einstaklinga. Þetta samsvarar 0,1% lækkun frá fyrra mánuði og er undirliggjandi hlutfall lánafjárhæðar í vanskilum í lok janúar 0,02% hærra en sama hlutfall í janúar 2012. Heimili í vanskilum eru 4.752 og þar af eru 610 heimili með frystingu á lánum sínum. Alls voru því 9,2% þeirra heimila sem eru með fasteignalán sín hjá Íbúðalánasjóði með lánin í vanskilum í lok janúar 2013. Það er 0,2% lægra hlutfall heimila en í lok janúar 2012.
Í lok janúar nam fjárhæð vanskila útlána til lögaðila alls um 2,7 milljörðum króna og nam undirliggjandi lánavirði 32,8 milljörðum króna. Tengjast því vanskil um 22,2% lánafjárhæðar sjóðsins til lögaðila, sem samsvarar 1,9% hækkun frá fyrri mánuði en er 1,4% lægra hlutfall en í lok janúar 2012.
Vanskil eða frystingar ná samtals til 14,99% lánasafnsins, en sambærilegt hlutfall í janúar 2012 nam 15,26%.
Eignasafnið
Þann 31.01.2013 átti Íbúðalánasjóður 2.261 fullnustueignir um land allt og hefur þeim fjölgað um 33 frá því 30.12.2012. Rétt rúmlega helmingur fasteigna sjóðsins voru áður í eigu byggingaraðila, fyrirtækja í leiguíbúðarrekstri eða annarra lögaðila, eða 1.155 eignir.
Þann 31.01.2013 voru 923 íbúð í útleigu um land allt. Þá voru 321 íbúð óíbúðarhæf og eru flestar þessara íbúða á byggingarstigi og því ekki fullbúnar en nokkur hluti þeirra er óíbúðarhæfur vegna aldurs og ástands.
Í sölumeðferð voru 826 íbúðir, annað hvort komnar í sölu eða unnið er að söluskráningu þeirra. Í töflu hér til hliðar er yfirlit yfir staðsetningu eigna flokkað eftir landshlutum og nýtingu/ráðstöfun þeirra.
Mestur hluti þeirra 923 íbúa sem eru í útleigu eru leigðar til fjölskyldna og einstaklinga sem dvöldu í eignunum þegar Íbúðalánasjóður eignaðist þær.
Sjóðurinn hefur einnig heimild til að leigja út eignir í almennri útleigu á þeim svæðum þar sem skortur er á leiguhúsnæði.
Þær íbúðir sem leigður út til almennrar útleigu eru auglýstar til leigu á mbl.is og fasteignir.is undir „íbúðir til eigu“ og er eingöngu hægt að sækja þar um leigu þeirra. Hægt er að skoða úthlutunarreglur á heimasíðu Íbúðalánasjóðs, ils.is.
Eignir sjóðsins eru leigðar út á markaðsverði og er miðað við sambærilegar eignir eftir staðsetningu, stærð, aldri og fleira.
Allar fasteignasölur í landinu geta tekið eignir Íbúðalánasjóðs í sölumeðferð en í gildi er samstarfssamningur við Félag fasteignasala um verklag við sölu eigna sjóðsins.
Af þeim 2.261 eignum sem Íbúðalánasjóður átti þann 31.01.2013 hefur 1.812 eignum verið ráðstafað í útleigu, sölumeðferð eða annað. Þá biðu 449 eignir frekari greiningar. Margar þeirra eru á svæðum þar sem er nokkurt offramboð af eignum til sölu og/eða leigu.
Þann 31.01.2013 hefur Íbúðalánasjóður selt 584 eignir frá áramótum 2007/2008.
