Ráðherra hefur falið Íbúðalánasjóði nýtt og veigamikið hlutverk með nýjum lögum um almennar íbúðir sem samþykkt voru á Alþingi í síðustu viku.
Með lagasetningunni er komin varanleg umgjörð að nýju félagslegu kerfi sem verður sjálfbært með tíð og tíma. Lagasetningin er unnin í samvinnu við sveitarfélögin og aðila vinnumarkaðarins í takt við samkomulag þeirra á milli frá 28. maí 2015 með það að markmiði að fjölga hagkvæmum og ódýrum íbúðum, styðja við leigumarkað, styðja við fyrstu kaup og tryggja aukið framboð af hagkvæmum leiguíbúðum. Til að ná því markmiði er lögð sérstök áhersla á nýbyggingar og að fjölga leiguíbúðum.
Lögin miða að því að bæta hag tekjulágra fjölskyldna og ungs fólks á vinnumarkaði. Þau stuðla að því að húsnæðiskostnaður sé í samræmi við greiðslugetu leigjanda.
Með þessu fyrirkomulagi, sem er hliðstætt því sem tíðkast hefur í Danmörku um áratugaskeið, mun smám saman byggjast upp nýr sjóður sem nefnist Húsnæðismálasjóður sem hefur það að markmiði að stuðla að sjálfbærni kerfisins þannig að leigjendurnir sjálfir viðhaldi kerfinu og tryggi að íbúðum haldi áfram að fjölga og að það fjármagn sem verður sett þar inn stuðli raunverulega að því að viðhalda kerfinu. Slíkt kerfi kemur ekki til með að raungerast fyrr en að nokkrum áratugum liðnum þegar lán sem tekin verða á næstu árum hafa verið greidd upp.
Húsnæðissjálfseignastofnanir, sveitarfélög, lögaðilar og félagasamtök sem hafa hlotið samþykki ráðherra og hafa það að langtímamarkmiði að byggja, eiga og hafa umsjón með leiguhúsnæði og eru rekin án hagnaðarsjónarmiða geta hlotið stofnframlög.
Fjármagn sem veitt er til stofnstyrkja er ákveðið í fjárlögum á hverju ári og ef ekki er unnt að samþykkja allar umsóknir metur Íbúðalánasjóður á hvaða svæði er brýnustu þörf fyrir leiguhúsnæði fyrir leigjendur undir tekju- og eignamörkum.