Magnús Árni Skúlason og Gunnar Haraldsson hafa unnið skýrslu fyrir Íbúðalánasjóð og velferðarráðuneyti á grunni opinberra upplýsinga um stöðu og þróun íbúðamarkaðarins á árinu 2015.
Helstu niðurstöður skýrslunnar eru:
- Velta á íbúðamarkaði jókst verulega árið 2015 og er útlit fyrir áframhaldandi aukningu í viðskiptum á íbúðamarkaði og hækkandi íbúðaverði. Velta og fjöldi þinglýstra kaupsamninga með húsnæði jókst umtalsvert á landinu öllu og standa nú í sömu hæðum og árið 2004.
- Samhliða þessu hefur raunverð íbúða hækkað töluvert og sú hækkun orsakast helst af bættu ástandi á vinnumarkaði, auknum kaupmætti og framboðstakmörkunum á nýbyggingamarkaðinum sem ekki nær að svara náttúrulegri eftirspurn.
- Hækkandi húsnæðisverði hefur fylgt hækkandi leiguverð og eru í dag sögulega margir á leigumarkaði á Íslandi.
- Staða fyrstu kaupenda fer ört batnandi þar sem fyrstu kaupum fjölgaði í öllum landshlutum á árinu. Ástæður þess eru trúlega helstar minnkandi atvinnuleysi, lægri vextir, aukinn kaupmáttur og svigrúm við veitingu fasteignalána til fjármögnunar kaupa á fyrstu fasteign.