- Gert er ráð fyrir að jákvæðri afkomu og engum frekari eiginfjárframlögum ríkisins skv. endurskoðaðri áætlun sjóðsins til 5 ára
- Viðskiptavinir sjóðsins munu upplifa betri þjónustu með einfölduðu skipulagi.
- Rekstrarkostnaður lækkar um 320 milljónir þegar aðgerðirnar eru að fullu komnar til framkvæmda á árinu 2017
- Hlutfall rekstrarkostnaðar er þá orðið lægst meðal lánastofnana hér á landi. Rekstrarkostnaður er áætlaður 1.550 milljónir árið 2017
- Hlutdeild sjóðsins á lánamarkaði er mest á landsbyggðinni og hjá efnaminni fjölskyldum
Framkvæmdastjórum fækkar um einn hjá Íbúðalánasjóði um mánaðamótin og skipulag sjóðsins verður einfaldað verulega. Breytingarnar miða að því að gera sjóðinn betur í stakk búinn til að sinna samfélagslegu hlutverki sínu og bæta þjónustu við viðskiptavini og almenning. Um leið er verið er að laga sjóðinn að breyttu rekstrarumhverfi og auka hagkvæmni í rekstri hans. Árlegur rekstrarkostnaður lækkar um 324 milljónir þegar aðgerðirnar verða að fullu komnar til framkvæmda á árinu 2017. Breytingarnar voru kynntar á fundi með starfsfólki í morgun.
Skipulagsbreytingarnar munu hafa jákvæð áhrif á reksturinn og eru rökrétt framhald af þeim aðgerðum sem gripið hefur verið til að undanförnu til að bæta afkomu sjóðsins s.s. með sölu eigna, þ.m.t. Leigufélaginu Kletti, lækkun rekstrarkostnaðar og bættri ávöxtun uppgreiðslufjármuna með fjárfestingum í verðtryggðum eignum. Í kjölfarið er áætlað að Íbúðalánasjóður muni skila jákvæðum rekstrarafgangi og ekki er lengur gert ráð fyrir að ríkissjóður þurfi að leggja sjóðnum til aukið eigið fé samkvæmt langtímaáætlunum sjóðsins. Á árinu 2015 var rekstrarkostnaður sjóðsins tæplega 1.874 milljónir króna en ný áætlun gerir ráð fyrir 1.550 milljónum í rekstrarkostnað á árinu 2017.
Sex starfsmönnum verður sagt upp í tengslum við skipulagsbreytingarnar en frekari fækkun stöðugilda verður m.a. náð fram með því að ráða ekki í stöður sem losna og með því að endurnýja ekki tímabundna samninga. Rekstrarkostnaður sem hlutfall af heildareignum er nú orðinn lægstur hjá Íbúðalánasjóði af lánastofnunum hér á landi. Hlutverk Íbúðalánasjóðs á fasteignalánamarkaði hefur breyst á síðustu árum og til merkis um það þá voru einungis 10% af nýjum húsnæðislánum sem veitt voru til heimila á árunum 2013 - 2015 frá sjóðnum. Hlutdeild sjóðsins er hins vegar mun hærri á landsbyggðinni og í lánum til þeirra sem fá síður fyrirgreiðslu annars staðar.
Lánasafn sjóðsins hefur styrkst mikið að undanförnu samfara hækkun fasteignaverðs og úrvinnslu skuldamála. Meirihluti lána sjóðsins eru tryggð á á fyrsta veðrétti og veðsetningarhlutfall útlána sjóðsins af fasteignamati er að meðaltali 45,8%. Eigið fé lántaka hjá sjóðnum telst því afar gott og sjóðurinn er vel varinn fyrir mögulegum sveiflum á fasteignaverði
Í rekstraráætlun Íbúðalánsjóðs til næstu fimm ára er gert ráð fyrir að eiginfjárhlutfall sjóðsins verði komið yfir 8% í lok tímabilsins.