Íbúðalánasjóði er heimilt að lengja upphaflegan lánstíma um allt að 30 ár þegar lántaki á í greiðsluerfiðleikum að ákveðnum skilyrðum uppfylltum. Þó má hámarkslánstími aldrei verða lengri en 70 ár.

Umsóknir um aðstoð vegna greiðsluvanda eiga ekki að berast Íbúðalánasjóði beint heldur banka eða sparisjóði sem fer yfir umsóknina og gerir tillögu til Íbúðalánasjóðs um úrlausn vandans. Æskilegast er að umsóknin berist banka eða sparisjóði þar sem viðkomandi á helstu viðskipti sín.

Ef umsækjandi á í verulegum greiðsluvanda, kominn í þrot með fjármál sín eða staða hans að öðru leyti umfangsmikil að mati fjármálastofnunar, vísar hún umsókn til Ráðgjafarstofu um fjármál heimilanna. Starfsfólk ráðgjafarstofunnar skoðar málið og gerir svo tillögu til Íbúðalánasjóðs og hlutaðeigandi fjármálastofnana um úrlausnir.

Skilyrði fyrir lengingu lána:

1. Að greiðsluerfiðleikar stafi af óvæntum tímabundnum erfiðleikum vegna veikinda, slysa, minni atvinnu, atvinnuleysis eða öðrum ófyrirséðum atvikum.
   
2. Að aðrir lánardrottnar umsækjanda samþykki einnig að veita aðstoð vegna greiðsluerfiðleika.
   
3. Að greiðslubyrði umsækjanda samkvæmt greiðslumati sé umfram greiðslugetu.
   
4. Að greiðslubyrði umsækjanda eftir skuldbreytingu og/eða frestun á greiðslum rúmist innan greiðslugetu.
   
5. Að lán sé í skilum.

Ef ástæða greiðsluerfiðleika er tímabundin tekjulækkun skal í mati á greiðslugetu miða við tekjur umsækjanda áður en tekjur lækkuðu. 

Fylgigögn umsóknar um lengingu lána

• Afrit af tveimur síðustu skattskýrslum, staðfestum af viðkomandi skattayfirvöldum eða löggiltum endurskoðanda.
• Afrit af launaseðlum síðustu þriggja mánaða.
• Afrit gagna er veita upplýsingar um lífeyri, bætur, meðlög, barnabætur, húsaleigu og aðrar tekjur.
• Afrit af síðasta greiðsluseðli allra lána umsækjanda.
• Afrit af samningum við kröfuhafa.
• Veðbókarvottorð.

Athugið að ekki er unnt að gera endanlega tillögu um lengingu nema umbeðnar upplýsingar liggi fyrir.