Nú hafa verið samþykktar breytingar á lögum um greiðslujöfnun fasteignaveðlána.
Greiðslujöfnun verður nú beitt við útreikning allra verðtryggðra lána einstaklinga sem tryggð eru með veði í íbúðarhúsnæði, nema lántaki óski annars. Greiðslujöfnun er leið til að létta tímabundið greiðslubyrði af reglulegum afborgunum lánsins með því að tengja þær greiðslujöfnunarvísitölu í stað vísitölu neysluverðs. Í greiðslujöfnunarvísitölunni er vegin saman launaþróun og þróun atvinnustigs. Lánið er eftir sem áður bundið vísitölu neysluverðs og breytist höfuðstóll lánsins í samræmi við hana.

Aðferðin við greiðslujöfnun felst í því að reiknuð verður ný vísitala, svonefnd greiðslujöfnunarvísitala. Ef greiðslur samkvæmt þessari vísitölu reynast lægri en greiðslur samkvæmt vísitölu neysluverðs er þeim hluta af greiðslum fasteignalánsins sem nemur mismuninum frestað þar til greiðslujöfnunarvísitalan hækkar á ný umfram neysluvísitöluna. Sá hluti greiðslnanna sem frestast er færður á sérstakan jöfnunarreikning sem bætist við höfuðstól lánsins. Sé skuld á jöfnunarreikningi við lok upphaflegs lánstíma er lánstíminn lengdur,um allt að 3 ár. Verði skuld á jöfnunarreikningi að þeim tíma liðnum fellur sú skuld niður.